SAJAK NAGI “PINTUH GEREJA SO TEKATO LEGI”

Katedral Larantuka Nusa Tenggara Timur
Katedral Larantuka Nusa Tenggara Timur

SAJAK NAGI

PINTUH GEREJA SO TEKATO LEGI

Karya: Thom Aresta Penyair Gila

Tuhan e
Baru sebenta-ora te,
Torang pung hati sunggo rasa sena tega bisa bekumpo dalam rumahMu ni
Torang pikir derita ae mata so kering ilang tenggelang
Me peranja-peranja timbo kembeli tambah merae bua hati torang po iko jadi piatu

Tuhan e
Tega apa maka sampe jadi begini
Macam jo orang bua ke’le mata ni
Pintuh suci baru sebenta tebuka, jo sekerang so leka tekato legi
Bua rasah rindu ketorang ana serani tambah mentadi unto merebo-merampa kurban suci data altar kudus

Peja diri jo mo omo begena legi
Berasu so tanggo derita jo sekerang hati po tambah meki’n sake
Tega denga petuah; kalo persisang taon ni di nagi, torang te bisa jalani legi
Jo mo tapang apa_jo mo marah sapa ?
Lebe bae torang tole bale pi diri unto ago bua nenoka, biar ido terada jadi binasa

Rasa rindu le unto bisa tate langkah sesama unto rayakan kurban misa dalam gereja
Rasa jiwa jadi selio kalo hari minggu ni ketorang cuma petotang angka doa badan sendiri
Tempo apa penyake bejangke-mangke ni bisa berakhir, Tuhan . . .
So ganti taon yang baru me te lia mo berenti-sepo po ne ni ??

Hela genta beri senya
Pasang kanta lambo mada puji
Mari ketorang be’da dada angka permesa
Kuatkan iman janga sampai lunto
Yakin percaya kalo hatu tempo badai ni pasti ilang lelalu

(Kota Serani/Larantuka, 27 Januari 2021 di tempo ujan rinte-rinte)

#PENYAIR_GILA